அந்தோனி, பாத்திமா நகர், கே.வி.கோட்டை , ஆலங்குடி. ராமசாமி தெய்வானை அம்மாள் அரசு மேல்நிலைப் பள்ளி - வல்லத்திராக்கோட்டை முதுகலை ஆங்கில ஆசிரியர். கவிஞர், மொழிபெயர்ப்பாளர். சொற்களுக்கு உயிருண்டு என்பதை உணர்ந்து அதற்கேற்ப உரையாடுகிறவர். எதையும் விளம்பரத்திற்காக செய்யாமல் மண், மக்கள் பயனுற செய்கிறவர். கோடை கால விடுமுறையில் ஆண்டனியின் ஆங்கில இலவச பேச்சுப் பயிற்சி வகுப்பு எடுத்துவருகிறார். ஒற்றைப்பனை, A PEEP AROUND , A ROSE IS A ROSE IS A ROSE ஆகிய நூல்களின் ஆசிரியர்.
தூவானம், எனும் இந்நூல் இவரது நான்காவது நூல். "ஆங்கில ஆசிரியர் தான் நான். ஆனால் வணிகம் செய்ய விரும்பவில்லை. இதயத்தையும் இந்தியாவையும் அன்பால் ஆக்கிரமிக்கவே விரும்புகிறேன். சுபயோக தினத்தில் அல்ல . உபயோக தினத்தில்தான் எனது நம்பிக்கையும் வாழ்க்கையும் நகர்ந்து கொண்டிருக்கிறது. அழகோடும் அளவோடும் கவிதைகள் இருக்க வேண்டும் என்று அன்போடும் அர்த்தத்தோடும் ஆலோசனை வழங்கிய ஐயா அருள்முருகன் அவர்களுக்கும்; கவிதைகளில் ஒளிபாய்ச்சி உளி பாய்ச்ச உதவிய ஆசான் பிரகாசம் அவர்களுக்கும்; கவிதைகளுக்கு ஞானத் தந்தையாக இருக்கும் நண்பர் பிரபாகரன் அவர்களுக்கும்; இனியவர் இயற்கை ஆர்வலர் இதயத்தில் இடம் பிடித்த இலக்குவணன் அவர்களுக்கும்; பரணிக்கும்,பதிப்பகத்தார்க்கும், கவிஞர் முத்துப்பாண்டிக்கும் எனது பணிவான நன்றிகள்" என தன்னுரையில் நன்றி பாராட்டுகிறார்.
இவரது கவிதைகளில் சொற்கள் மின்னலென வந்து விழுகின்றன. வெளிச்சச் சொற்கள் மழையில் நனைந்து பதத்துப்போகையில் அயனிச் சொற்களால் செறிவூட்டுகிறார். அப்படியாகச் செறிவூட்டப்பட்ட
இத்தொகுப்பில் ஒரு கவிதை
பார்வை
கதிர்வீச்சால்
பாதிக்கப்பட்டவன் நான்-
நிவாரணம்
வழங்குவாயா
செறிவூட்டப்பட்ட உன்
புன்னகையால்?
கருத்துகள்
கருத்துரையிடுக