புலவர் யா.வென்னரசு

 புதுக்கோட்டை எழுத்தாளர் - 166

புலவர் யா.வென்னரசு,  சந்தப்பா வேந்தர். இவரது இயற்பெயர் யா.மரியசெயராசன், ஆசிரியராகப் பணியாற்றி ஓய்வு பெற்றவர். எந்நேரமும் கவிதை மனம் கொண்டவர். தனது மானசீக ஆசானாக மொழி ஞாயிறு தேவநேயப் பாவாணர் அவர்களை ஏற்றுக்கொண்டவர். தனித்தமிழ் பற்றாளர். தனது இல்லத்திற்குப் பாவாணர் இல்லம் எனப் பெயர் வைத்தவர். 03.02.1975 இல் பாவலர் ஏறு பெருஞ்சித்திரனார் அவர்களால் பாவாணர் படத்தைத் திறந்து வைத்த பெருமைக்குரியவர்.  1969 இல் பாவாணர் பாசறை எனும் அமைப்பைத் தொடங்கி தனித்தமிழ்க் கொள்கை முழக்கம் செய்தவர். இந்தப் பாசறையில் கவிச்சுடர் கவிதைப் பித்தன், கு.மாரிமுத்து, மு. இளங்கோவன், வெள்ளிநிலவன், தனிக்கொடி, இளமாறன், கருணாநிதி, தமிழ்த்தும்பி தமிழ்மாறன்,நிலவை.பழனியப்பன்,மா.இலக்குவன், சுவாதீ,  முத்துகலா என்று பலரும் பங்காற்றியிருக்கிறார்கள். 18.9.1982 இல் கந்தர்வகோட்டையில் நடந்த ஆசிரியர் சங்கக் கூட்டத்தில் பாட்டரங்கத் தலைமையேற்றுப் பாடியிருக்கிறார்.

1980 இல் புதுக்கோட்டையில் இவரது கவியரங்கப் பாடலைக் கேட்ட உவமைக் கவிஞர் சுரதா அவர்கள் சந்தப்பா வேந்தர் என்று பாராட்டிச் சிறப்பித்தார். மீண்டும் அவரே 24.3.1991 இல் கரூர் திரு.வி.க மன்றம் பாரதிதாசன் நூற்றாண்டு விழாவில் சந்தக்கவிமுரசு என்று பட்டம் வழங்கிச் சிறப்பித்தார். 1984 இல் புதுக்கோட்டை திலகவதியார் திருவருள் ஆதீனம் சந்தக்கவிமணி என்று பட்டமளித்துச் சிறப்புச் செய்தது. 1983 இல் அமுத சுரபி மாத இதழில் தெருவெல்லாம் தமிழ்முழக்கம் பகுதியில் திரு. குன்றக்குடி பெரியபெருமாள் அவர்கள் இவரது தமிழ்ப்பணியைப் பாராட்டி பாவாணர் பாசறை பைந்தமிழ்ப் பட்டாடை , பாடும் கவிஞர் பலர் கூடும் மணியரங்கு,  நாடு மொழி இன உணர்வுக்காகப் பாடும் பாசறை, என்று எழுதிச் சிறப்பித்தார்.

புலவர் யா.வென்னரசு கவிதைகள் எனும் இக்கவிதைத் தொகுப்பு புலவரின் 58 ஆவது பிறந்த நாள் பரிசாக வெளிவந்தது.முழுக்க சந்தக் கவிகள்.  இத்தொகுப்பில் ஒரு கவிதை.

தலைப்பு - பொங்கல் விழா

புத்தரிசி நறுநெய்யும் பருப்பும் வெல்லப்
பாலுடனே மணப்பொடியும் சேர்த்துப் பொங்கும்
முத்தமிழர் தனிவிழாவாம் பொங்கல் நாளில்
மூத்தவர்கள் இளையவர்கள் யாரும் சேர்ந்து
புத்துணர்வில் பொங்கலோநற் பொங்க லென்று
பூரிக்கும் இன்பநன்நாள் பொங்கல் நன்நாள்
தித்திக்க அவையோரே வணக்கம் சொன்னேன்
தீந்தமிழன் பாட்டாலே வாழ்த்து கின்றேன்

வறுமையை ஒழிக்கின்ற மையம் நாட்டின்
வளமைக்கே ஒருமையம் வளர்ச்சி மையம்
பெருமையை வளர்க்கின்ற மையம், கல்வி
பெருக்குகின்ற ஒருமையம் அறிவின்மையம்
ஒருமையை ஊட்டுகின்ற உணர்வை நாட்டின்
உயிர்மெய்யாய் உரிமையாகும் உண்மை மையம்
ஒருமைக்கும் பெருமைக்கும் பெருமை சேர்த்த
ஒருமெய்யம் திருமெய்யம் இந்த மையம்

உலகத்தின் அச்சாணி உழவனென்று
ஒருமுகமாய் எல்லோரும் போற்றுகின்றோம்
நிலத்தினிலே இலைமக்கி மண்ணில் மண்ணாய்
நிலைப்பதுபோல் உழவர்களும் இருக்கின் றார்கள்
உலகத்தார் வயிறெல்லாம் நிரம்பு தற்கே
உழவர்தம் வயிறெல்லாம் காய வைத்தார்
உலகத்தில் வீடெல்லாம் சமைப்பதற்கு
உழவர்தம் வயிற்றினிலே நெருப்பை வைத்தார்.

-16.01.1988 இல் திருமயத்தில் நடைபெற்ற பொங்கல் விழாவில் தலைமையேற்றுப் பாடிய பாட்டரங்கத் தலைமைப்பா.